Ganz fiin und zart si Dini Eschtli gsi, i hällem, früschem grüen hesch Du glüchtet wenn d’Sunne am Himmel gstande isch. U so wie Du Dini fine Eschtli gäg em Himmel zue gstreckt hesch, so ha o i mini Chinderarme usbreitet, voll glücklicher Erwartig a jedem nöie Tag.

Gross und mächtig bisch Du da gstande, hesch mängs Jahr Wind u Wätter stand ghalte, hesch breiti, chreftigi Escht, e feschte Stamm übercho. Du mi liebe Tanneboum, i möcht grad so si wie Du, möcht Wurzle ha wo Halt gä im Läbe, möcht Arme ha, so starch u fescht wie Du.

Jetz chum i zu mim liebe Tanneboum, zu mim stille, vertroute Plätzli. I luege zu Dir ufe, gseh wie d’Wulche über Dir zieh, ghöre wie der Wind fiin ruscht i Dine Escht. Mis alte Härz wird liecht u voller Glück, es ma nümm ufzelle, wie mängisch Du mir Fröid u Troscht gschänkt hesch.