Hüt wird wider einisch öppis feins gchöcherlet: e Chäsröschti! U das geit öppe eso: Zerscht wärde d’Bärner Orange (öppe es Kilo), wo mir scho geschter gschwellt hei, ghültschelet. U denn mit der Röschti-Raffle i-n-es Becki grafflet. In der Zwüschezyt isch d’Bratpfanne scho agwermt u zwe Löffel Bratbutter si heiss drin worde. So cha’s also losgah, d’Röschti chunt i d’Brapfanne, derzue e halbe Teelöffel Salz. U jetz cha’s uf em Zähni afa sprätzle. Das geit öppe 10 Minute, bis alles schön goudbrun worde isch. U dass es schön regelmässug brätlet, wird die Röschti geng einisch umgrüehrt. Nach 10 Minute chunt de scho ds grosse Finale: Ei Zibele, wo mir scho vorhär gschiblet oder gwürfelet heit, wird im Egge vo der Bratpfanne schön abrätlet, bis es fein schmöckt u denn i d’Röschti inegrüehrt. Derzue schnäfle mir öppe 200 Gramm Wäutmeischterchäs us Rüderswil (wichtig) drüber u lah ne uf der heisse Röschti la verloufe.

Ganz zum Schluss wärde no es Chrütli drüber gströit, Majoran zum Bischpil, oder Chümi. Das ganze wird denn schön heiss mit früschem Salat serviert u mit gueter Lune gässe. Heit e Guete!

Adväntsfänschter – Im Ämmitau si si jetz überall z’gseh, d’Adväntsfäischter. Für jede Tag im Advänt wird es Fänschter wiehnachtlich gschmückt u schön zwäggmacht. U sobald d’Adväntszyt da isch, wird jede Tag eis vo de Fänschter eröffnet, präzys wie bim ne Adväntskaländer mit de Türli. Ds Liecht im Fänschter wo zum nöie Adväntstag ghört wird azündet, d Lüt us em Dorf chöme am abe das Kunschtwärch cho luege u bestuune. U vellicht offeriert der Gaschtgäber sogar öppis heisses z’treiche oder öppis für e Gluscht. Ds Fänschter vo hüt isch vo de Chind ir Chiuchegmeind Rüderswil gstaltet worde. Es zeigt e Hirt mit Schäfli, wie Dir uf em Bild chöit gseh. Was es no alles z’gseh git bis zum heilige Abe, cha uf der Adväntsfänschter Homepage nachegluegt wärde.

Ich lebe seit bald sechs Monaten in Rüderswil und bin glücklich, an diesem schönen Ort ein neues Zuhause gefunden zu haben. Da ich mich nun schon etwas eingelebt habe, möchte ich gerne neue Bekanntschaften machen, am liebsten hier im Dorf Rüderswil selbst. Und da ich seit mehr als 20 Jahren in der technischen Informatik arbeite (…eine biblisch lange Zeit für dieses Gewerbe!) kam ich auf die Idee, etwas vom meinem gesammelten Wissen weiterzugeben: wenn Sie mir Ihrem PC (oder Drucker, oder Modem oder iPhone) Probleme haben oder einfach wissen möchten, wie eine bestimmte Aufgabe mit dem Computer gelöst wird, dann kontaktieren sie mich bitte. Ich helfe gerne und unentgeltlich und ich freue mich auf neue Bekanntschaften. Meine Adresse finden Sie rechts unter der Rubrik «Über mich».

Nöizuezügerabe – Ja, das git es no hie z‘Rüderswil u das isch e gfröiti Sach. Aui, wo nöi im heimelige Ämmitauer Dorf es Deheim funge hei, wärde vom Gmeindrat iiglade, erfahre mängs über ds Dorf u wärde am Schluss sogar bewirtet mit feine Sache us der Region. Hürigs Jahr het der Nöizuezügerabe i dr Pfrundschür grad näb der Chiuche stattgfunde. U die nöie Rüderswiler si cho: us Schwande, us Zollbrügg, vom Mützlebärg oder zmitz us em Dorf hei si der Wäg i d Schür funde u si häreghocket zum lose, was itz chunt. Uf sehr sympathischi und fründschaftlichi Art isch druf vo de Gmeindrätinne u Gmeindrät ds Dorf vorgstellt worde, derzue het es Bilder z’gseh gä vo de verschidene Plätz rund um Rüderswil. Mängs Wüssenswärts hei mir erfahre, vom Gwärb, vo de Schuele, vo de Dörfer rings um Rüderswil ume u no einiges meh. Bi der Vorstellig het natürlich o der berüemtischt Rüderswiler, der Niklous Löiebärger nid dörfe fähle, em Bärner Burefüehrer isch ja ds Dänkmal am Igang zum Dorf gwidmet.

Nach der Präsentation hei alli Neuzuezüger d’Glägeheit übercho, sich sälber mit es paar Wort vor z’stelle und uf das Abe het es es Apéro gäh. Das hei mir natürlich gnosse, hei nöis brichtet, hei Lüt lehre kenne u bi me Glesli Wi e schöni Zyt gha. Ja, es isch e gäbige Abe gsi u wo mir üs de wider uf e Heiwäg gmacht hei, isch gwüss i mängem Chopf der Gedanke läbändig gsi: Schön isch es, i üsem Rüderswil. Zum Schluss möcht i danke säge: allne, wo dä Abe müglich gmacht hei, bsunders em Rüderswiler Gmeindrat u der Christina, wo der Abe gleitet het.

U so het’s sich der Tag hüt am Morge am achti im Doggebrunne bi Rüderswil zeigt. Früsche Schnee isch gläge u der Himmel isch wulcheverhange gsi. Derzue isch es für die Jahreszyt ärschtig chalt gsi.

Hüt möcht i öppis über die vierbeinige Bewohner i üsem Deheim verzelle. U da blibt mir wäger nüt anders übrig als mit em Silvan azfange. Scho am Morge isch si chreftigi Haflingerstimm z’ghöre wenn är erwachet u zum nöie Tag möcht begrüesst wärde. Freudig chlopft är a d’Stalltür, sobald öpper im Igang z’gseh isch u laht nid lugg, bis är e tolle Bitz Brot het überchoh. E freine u stattliche Haflinger isch der Silvan u wenn är um z’Hus trabt, de isch es grad, als ob är sich desse ganz bewusst wär. So schön u stolz zeigt är sich vor em Hus, wenn är Usgang het.

Gsung u chreftig isch der Flix, üse Huskater. Dir gseht ne da grad bim sünnele uf em Briefchaschte. Der Flix isch aber nid nume e prächtige Moudi, är isch o schlau. U vo däm, was der lieb läng Tag um ds Hus ume passiert, entgeit ihm gredi use nüt! Dernäbe weiss der Flix immer, wo es öppis Ässbars z’hole git – mit Ängelsgeduld cha är vor em Pfäischter warte, bis es ufgeit u är ändlich nöis überchunt…

Alli Tierli hei es Lieblingsplätzlil, bim Flix isch es der Briefchaschte, wie mir scho gseh hei. U das führt üs zum nächschte Bewohner, em Mittelpünktli, der alte Chatzedame. Warum das Büssi grad so heisst u nid anders, wei mir es anders mal erzelle. We d’Sunne schint und es schön warm isch, de hocket ds Pünktli uf em Trans-Vatter-More-Hüsli vor em Garte. Dä Chaschte isch drum us Stei, nimmt also d’Wermi vo der Sunne uf, was Chatze bekanntlich gärn hei. Derzue het ds Pünktli vo däm Platz us geng der Überblick, was gattis u cha sich mit es paar Schritt unter de Rebarbere-Bletter verstecke, wenn d’Sunne sött heisser brönne als ihm lieb isch.

D Chile vo Rüderswil isch gwüss ds schönschte Gebäude im Dorf u bildet zäme mit em Pfarrhus und der Pfrundschür e harmonischi Einheit, wo ds Bild vom Dorf sit vile Jahr prägt. Uf Site 21 i der Rüderswiler Dorfchronik chöi mir alles über das Gebäude mit em markante Turm erfahre. Der Turm sälber söll scho im 15. Jahrhundert bout worde si; ganz sicher sige sich da aber d’Fachlüt nid. Item, mir wei sälber ga gschoue und bestune vom schön pflegte Chilehof dä stattlich Turm. D’Glogge im Turm hei e hälle Klang und lade i zum zuelose u dra sinne, was der Klang vo de Glogge i alte Zyte z’säge het gha. Es isch de Lüt im Dorf es Zeiche gsi zum Haltmache, wenigschtens e Momänt, e Iladig für es Gebätt oder e Pouse zwüsche dr herte Arbeit.

U jetz lade üs d Chileglogge i, die schöni Bärner Chile ou vo inne z’bestune. Schön und firlich isch es i der Rüderswiler Chile, e würdevolli Stilli und e verheissigsvolli Chraft si z’gspüre. Der Bsuecher wird iglade, zum innehalte und sinne a das, was mir mit Ouge nid chöi gseh, a das, wo mir mit Wort nid chöi beschribe. Was i der Rüderswiler Chile bsunders uffallt: Dank de grosse Pfäischter isch es häll; die düschteri Atmosphäre, wo i andere Chile z’finde isch, git es hie in Rüderswil nid.